ស្នងការរងខេត្ត បាននាំយកថវិកាសមាគមមិត្តនគរបាលជាតិ ប្រគល់ជូនគ្រួសារសពលោក ប៉ែន រិទ្ធ
05-September-2018 | ដោយ ពលមនសិការ
តាកែវ៖ ដោយអនុវត្តតាមការណែនាំចង្អុលបង្ហាញ និងបញ្ជាផ្ទាល់ពី ឯកឧត្តម ឧត្តមសេនីយ៍ទោ សុខ សំណាង ស្នងការ នៃស្នងការដ្ឋាននគរបាលខេត្តតាកែវ និងជាប្រធានគណៈកម្មាធិការមូលដ្ឋានសមាគមមិត្តនគរបាលជាតិ នៃស្នងការដ្ឋាននគរបាលខេត្តតាកែវ។
នៅព្រឹកថ្ងៃពុធ ១០រោច ខែស្រាពណ៍ ឆ្នាំច សំរិទ្ធស័ក ព.ស ២៥៦២ ត្រូវថ្ងៃទី៥ ខែកញ្ញា ឆ្នាំ២០១៨ លោក វរសេនីយ៍ឯក ឃី វណ្ណា ស្នងការរងទទួលផែនការងារគ្រប់គ្រងធនធានមនុស្ស បានដឹកនាំក្រុមការងារ នៃស្នងការដ្ឋាននគរបាលខេត្តតាកែវ និង លោក អធិការ អធិការរង លោក នាយប៉ុស្តិ៍នគរបាលរដ្ឋបាល និង សហការី បាននាំយកថវិកាសមាគមមិត្តនគរបាលជាតិចំនួន៦លានរៀល ប្រគល់ជូនដល់លោកស្រី ហ៊ួ គឹមហ៊ន ត្រូវជាភរិយា សពលោក ប៉ែន រិទ្ធ ជាមន្ត្រីចូលនិវត្តន៍ នៃអធិការដ្ឋាននគរបាលស្រុកព្រៃកប្បាស ខេត្តតាកែវ ស្ថិតនៅភូមិភូមិចំប៉ា ឃុំចំប៉ា ស្រុក ព្រៃកប្បាស ខេត្តតាកែវ ដែលបានទទួលមរណៈភាព កាលពីថ្ងៃទី០១ ខែកញ្ញា ឆ្នាំ២០១៨ (ដោយជម្ងឺកាំងបេះដូង)។
ថ្លែងក្នុងឱកាស និង អារម្មណ៍ដ៏ក្តុកក្តួលនោះដែរ លោក វរសេនីយ៍ឯក ស្នងការរង បានសំណេះសំណាលជាមួយក្រុមគ្រួសារសព ហើយបានពាំនាំនូវការផ្តាំផ្ញើសាកសួរសុខទុក្ខ និងចូលរួមរំលែកទុក្ខ ពីសំណាក់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានកិត្តិយសសមាគមមិត្តនគរបាលជាតិកម្ពុជា និងឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានគណៈកម្មាធិការកណ្តាល សមាគមមិត្តនគរបាលជាតិកម្ពុជា និងឯកឧត្តម ស្នងការនគរបាលខេត្តតាកែវ ជាប្រធានគណៈកម្មាធិការមូលដ្ឋានសមាគមមិត្តនគរបាលជាតិ នៃស្នងការដ្ឋាននគរបាលខេត្តផងដែរ ៕
ចំនួនអ្នកទស្សនា
- ថ្ងៃនេះ1501
- ម្សិលមិញ16391
- សប្តាហ៍នេះ47731
- ខែនេះ162881
- ឆ្នាំនេះ162881
- សរុប20605337